Azərbaycan Texnologiya Universitetinin əməkdaşları şəhid tələbəmiz Ruslan Məmmədovun ailəsini ziyarət ediblər.
Elm və innovasiyalar üzrə prorektor v.m.i.e. Mayıs Gülalıyev, Ümumi və tətbiqi fizika kafedrasının müdiri Məntiq Cəfərov, Ümumi və tətbiqi riyaziyyat kafedrasının müdiri Hamlet Kəsəmənli, Kimya və metallurgiya mühəndisliyi kafedrasının müdiri Musa Cəfərov və Yüngül sənaye mühəndisliyi və dizayn kafedrasının müdiri Tofiq Mirzəyev şəhid tələbəmiz Ruslan Məmmədovun ailəsini Sumqayıt şəhərində ziyarət ediblər.
ATU əməkdaşları ailə ilə söhbət zamanı universitetin Ruslanla daim fəxr etdiyini, digər tələbələrimiz üçün vətənpərvərlik nümunəsi olduğunu bildirib, valideyninə belə bir oğul tərbiyə etdiyi üçün minnətdarlıq ifadə ediblər, daha sonra ailə ilə birlikdə Ruslanın məzarını ziyarət edərək ruhuna dualar oxuyublar.
Azərbaycan Ordusunun leytenantı olan Ruslan Məmmədov 2020-ci il sentyabrın 27-də Vətən müharibəsinin başladığı vaxt döyüşlərdə şücaət göstərib, Suqovuşanın azadlığı uğrunda gedən döyüşlərdə savaşıb. Noyabrın 1-də Ağdərə istiqamətində şəhid olan Ruslan "İgidliyə görə ", "Vətən uğrunda, "Suqovuşanın azad olunmasına görə", "Laçının azad olunmasına görə" medalları ilə təltif edilib.
Ruhu qarşısında baş əyirik.
Allah rəhmət eləsin!
 

229 dəfə oxunub